آآآآآآآآه يا نافوخي ... أنا انضربت بتاج

وأخيرا وبعد طول انتظار واحد عبر أهلي وحدفني بتاج وهو صديقي محمد ومدونته فن الحياة
هو تاج رزل بصراحة بس مقبول منك يا صاحبي ومعذرة علي التأخير في الرد عليه .. ظروف الامتحانات بأه
يلا نبتدي بأول سؤال


انت مين؟؟

وانت مال ........ سيادتك شغال عصفورة بعد الضهر ولا إيه
عموما يعني الموضوع مش سر
بص يا سيدي .. أنا اسمي خالد .. أدين بدين خالد .. وأنتمي لدعوة خالدة (خالدة دي احتمال يبقي اسم مراتي) .. أدرس في كلية من كتر ماهي طويلة يتهيأ لك إنها خالدة برضه.. بحاول أعمل أي حاجة يفضل أثرها من بعدي خالد .. عشان أوصل في الآخر لجنة الخلود (خلود ده كان دلعي زمان)
أظن المعلومات كفاية وزيادة ولو عايز أكتر تقدر تطالع تدوينة كتبتها قبل كده بعنوان وبحثت عن ذاتي .. فوجدت ؟؟


مين أكتر 6 شخصيات بتحبها ؟؟؟

ستة بس !!!!! انت معندكش اصحاب يابني وعايز تطلع عقدك عالناس ؟؟؟
عموما يا ريس هحاول
نيابة عن كل الأنبياء أختار .. سيدنا محمد صلي الله عليه وسلم
نيابة عن الصحابة أختار .. سيدنا خالد بن الوليد
نيابة عن التابعين أختار .. الحسن البصري
نيابة عن المحررين أختار .. صلاح الدين الأيوبي
نيابة عن المصلحين أختار .. حسن البنا
وتبقي الشخصية السادسة مبهمة لن أفصح عنها وتحتمل أن تكون أي واحد مش هقولكو عليه
ملحوظة : أبويا وأمي باعتبرهم وأنا شخص واحد عشان كده مش مكتوبين


هل أنت سعيد ؟؟؟؟

لأ .. أنا خالد (:
والله مشروع السعادة ده متأجل شوية لحد مانشوف كتابنا هيبقي في اليمين ولا الشمال


لو اجتمعت مع حسني مبارك هتقوله إيه ؟؟؟؟؟

معقووووووولة ... انت حسني مبارك بنفسه
أعوذ بالله من الشيطان الرجيم


لو معاك مليون ونص هتعمل بيهم إيه ؟؟؟؟؟

انت هتهرج يلا ولا إيه ؟؟.. المليون ونص اللي انت فرحان بيهم دول شوية فكة في محفظتي
عموما يعني لو لقيتهم معايا أول حاجة هحولهم باليورو وبعدين هاخد شوية أشتري بيهم عربية مرسيدس لماما عشان أنا وعدتها وانا عندي 5 سنين اني لما هكبر هجيبلها عربية مرسيدس عشان ضهرها كان بيوجعها لما كانت عربيتنا (هتلاقوها معروضة في المتحف المصري) بتطلع مطب ..وباقي الفلوس ثص لفلسطين ونص لمصر


بتحب مصر ؟؟؟؟؟؟؟؟؟؟؟

أكتر من الفول والطعمية والأيس كريم كمان


بتحب البنات ؟؟؟؟

مممممممممممممممممممم احم احم ... هما اللي بيحبوني


انت مسلم ؟؟؟

أمال بوذي مثلا وبستعبط
انت مش شايف شعار الإخوان المسلمين فوق


ليه ؟؟؟؟

آآآآآآآه .. انت فاضي بأه
علي العموم .. حوار ليه ده طويل أوي احتمال أعمله تدوينة لوحده


ايه أكتر موقف محرج اتعرضت ليه ؟؟؟

يوم ما عرفتك يا بايخ
الموقف اللي بعديه بأه هحكيلكو عليه
واحد قريبنا من بعيد كان كل مايشوفني يسلم عليا بحرارة أوي ويسألني عن تفاصيل في حياتي يمكن أنا نفسي مش عارفها وبالتالي أنا كمان كنت بسلم عليه بحرارة جدا بس للأسف الشديد مكنتش عارف اسمه!!!!
المهم في مناسبة عائلية اتكسفت من نفسي وقلت لازم أعرف اسمه .. المهم سألت واحد قريبنا من بعيد برضه بس كنت عارف اسمه .. هو الأخ اللي قاعد هناك ده اسمه إيه لحسن كل مايشوفني يسلم عليا بحرارة أوي وأنا مش عارف اسمه
لقيت قريبنا اللي أنا سألته ده عمال يضحك ولقيته بينادي علي الراجل اللي أنا عايز أعرف اسمه وبيقوله الحق يا دكتور عبدالله .. خالد بيسألني عن اسمك .. واكتشفت ان الاتنين كانوا اخوات (صباح الفقر يعني ) وانا مش عارف


واتصرفت ازاي ؟؟؟

قولتله لأ أنا عارف الدكتور عبدالله طبعا أنا بسأل علي اللي قاعد جنبه (الحمد لله مطلعش أخوه التاني) وربنا يسامحنا بقي


ايه الأمنية اللي بتدعي ربنا يحققهالك ؟؟

انه يرضي عني أولا ويريحني منك ثانيا



وبعد طول كتابة أخيرا خلص التاج ومعدش فاضل غير إني أبعته .. بس المشكلة فيه ناس كتير أوي عايز أبعتهولهم
هختار منهم
1- مصطفي أبو شعر طويل ومدونته .. مش عارف اسمها
2- أحمد ومدونته .. إشراقة قلم
3- ميدو مجدي ومدونته .. فري إيجيبت
4-عمرو طموح ومدونته .. نجوم الحيرة
5- أبو الوفا ومدونته .. كرينيم